Naka-code white alert status na ang Department of Health Central Visayas alang sa umaabot nga adlaw sa pasko ug bag-ong tuig.
Kini ang gipaambit ni Dr. Shelbay G. Blanco, DOH Medical Officer IV, diin nagtumong sa pag-andam sa mga health facility alang sa mga posibleng motumaw nga insidente hilabi na may kalabutan sa fireworks injuries.
Gihimangnoan ni Dr. Blanco nga kung mahimo likayan ang pagpabuto sa mga huot nga lugar ug kung mahimo magpabuto sa mga open area aron malikayan usab ang sunog.
Gidasig usab niini nga mas labing maayo adunay opisyal sa barangay ang mangulo aron mausa ug mabulukon ang pagsugat sa pasko ug bag-ong tuig nga walay natala nga insidente.
Hugot usab nga gibantayan sa buhatan ang mga road crash gumikan gilauman nga mosaka ang datos sa mga insidente sa kadalanan ning nagsingabot na ang holiday season tungod ang ubang mga tawo gikan sa party ug mouli nga nakainom og ilimnong makahubog.
Busa, giawhag niini ang publiko nga kung nakainom kay dili nalang mobiyahe inay paabuton nalang nga mahuwasan aron makauli nga luwas sa ilang tagsa-tagsa ka mga panimalay.
