Nipahimangno ang National Bureau of Investigation – Central Visayas Regional Office (NBI-7) sa publiko nga magbinantayon sa mga mangingilad gumikan sa pagsiaw niini sa panahon sa Pasko.
Kini ang gipaambit ni Atty. Rennan Augustus Oliva, ang Regional Director sa NBI-7 diin nunot sa ilang mga nadawat nga taho nga padayon gihapon ang pagpanglimbong ug pagpanghimulos sa ubang mga tawo sa ilang isig kaingon.
Sama nalang sa kaso ni Reymart Solon gikan sa Barangay Bakilid sa Mandaue City nga nihangyo sa buhatan nga imbistigahan ang mga grupo sa Mortgage Transaction usa ka propriedad nga anaa nahimutang sa Barangay Mambaling, ning dakbayan sa Sugbo.
Matud pa nga ang biktima kay nakahatag og P4 milyones human ang suspek giingong nipadugang og P500,000 ug didto na kini natingala.
Ila dayon kini nga gi-respondihan niadtong Disysembre 10 ubos sa direktiba ug giya ni Director Atty. Angelito Magno, ingon man nga atol sa operasyon kay nadakpan ang nanag-iya nga si Janice Chiu Dy nga taga Barangay Duljo, ug gawas kang Janice, adunay lain pa nga indibidwal ang nasikop nga giila nga sila si Rowena, Edgardo ug ang uban pa nga gawasnon ug nag-atubang sa kasong Estafa ug Falsification of Public Documents.
Gidugang ni Atty. Oliva nga gikonsiderar nga sindikato ang mga dinakpan gumikan dili yano ang mga kalihokan sa grupo ug nalambigit kini sa mga dinagkong kwarta nga gigamitan og mga peke nga dokumento.
