Klaro nga propaganda lang ang gidineklarar nga upat ka adlaw nga ceasefire sa central committee sa Communist Party of the Philippines- New People’s Army nga giingong pagkonsiderar sa umaabot nga Pasko ug bag-ong tuig.
Kini ang gihimug-atan ni Lt. Col. Israel Galorio, ang tigpamaba sa Armed Forces of the Philippines Visayas Command nga walay koneksyon sa pagselebrar sa pasko ang ilang gianunsyo gumikan pamaagi lang nila kini aron ipadayag nga aduna pa gihapon silay bili sa katawhan, ingon man nga padayon ang ilang mga kalihokan.
Apan, gitataw ni Galorio nga wala na silay nakuha nga suporta gikan sa komunidad hinungdan nga ila kining gihimo.
Dugang sa opisyal nga nagkahinay na ang ilang grupo gumikan usab nga ang tibuok hanay sa militar kay naka-pokus sa pagtuman sa ilang mandato sa pagpanalipod sa mga komunidad ug mga lungsuranon sa tibuok nasud.
Subay usab sa gimando sa Department of National Defense nga magpadayon ang ilang mga operasyon ug gipasiugda ang ilang hugot nga koordinasyon sa Philippine National Police (PNP).
Ingon man nga nipasalig ang AFP nga taliwa sa anunsyo ug giisip nga propaganda, magpabilin sila nga mabinantayon sa seguridad sa publiko aron mapalambo ang malinawon ug luwas nga panahon sa kapaskuhan alang sa tanang Pilipino hilabi na sa Central Visayas.
