Mikanaog na usab si Rossana Fajardo isip commissioner sa Independent Commission for Infrastructure (ICI), epektibo sa Disyembre 31, 2025.
Sa iyang pamahayag, wala niya gitino ang hinungdan sa iyang desisyon ug wala usab niya gihatag ang mga detalye kung kinsa ang temporaryong mopuli kaniya.
Gitawag ni Fajardo ang iyang lakang nga usa ka “courtesy resignation,” nga kasagaran gibuhat aron mahatagan og dalan ang usa ka tawo nga gitudlo sa appointing authority.
Ang iyang pagbiya nagsunod sa pag-resign ni kanhi Sec. Rogelio Singson, usa usab ka ICI commissioner, kinsa mi-resign karong bulana.
Kahinumduman, nga ang ICI gitukod niadtong Septyembre 2025 aron pagpahigayon og hingpit nga pagrepaso sa dagkong mga proyekto sa imprastraktura, labi na ang kontrobersyal nga mga programa sa pagkontrol sa baha nga nalambigit sa mga alegasyon sa korapsyon.
Ang sunod-sunod nga mga resignation nagpatunghag mga kabalaka bahin sa kapasidad sa komisyon nga magpabilin nga lig-on ug epektibo sa pagdumala sa mga proyekto sa gobyerno.
