Nanguna sa natala nga mga noncommunicable diseases ang stroke ug heart attack karong panahon sa kapaskuhan basi sa pinakabag-o nga report gikan sa Department of Health (DOH).
Gikan sa Disyembre 21-28, adunay sumatotal nga 190 ka mga kaso sa noncommunicable diseases ang natala sa maong panahon.
Sa kini nga numero, 118 ka mga kaso ang acute stroke o brain attack, samtang 49 ka mga kaso ang acute coronary syndrome o heart attack, samtang, 23 ka mga kaso ang natala sa bronchial asthma.
Basi sa datos, ang atake sa utok ug atake sa kasingkasing mas komon sa mga lalaki, nga nalambigit sa mga hinungdan sa peligro sama sa taas nga presyon sa dugo, pagpanigarilyo, ug dili himsog nga estilo sa kinabuhi.
Mas taas ang gidaghanon sa bronchial asthma sa mga babaye.
Tungod niini, gipahinumdoman sa DOH ang publiko nga ang dili makatakod nga mga sakit mapugngan pinaagi sa himsog nga pagkaon, regular nga ehersisyo, paglikay sa dili maayo nga mga batasan, ug sayo nga pagbisita sa doktor.
