Ang iladong komedyante nga si Gil Aducal Morales, mas nailhan isip “Ate Gay,” nagpabilin sa kritikal nga kahimtang human gidali pagdala sa emergency room sa Asian Hospital niadtong Oktubre 17.
Kini human siya nakasinati og “septic shock” ug “acute respiratory failure” tungod sa “pneumonia”—usa ka impeksyon nga makaapekto sa pagginhawa ug sirkulasyon sa dugo.
Sa usa ka pahayag nga gipagawas sa pamilya ni Ate Gay niadtong Biyernes, gipahibalo nga ang komedyante kasamtangang anaa sa “Intensive Care Unit” (ICU).
Ang komedyante nadayagnos usab kaniadto nga adunay “mucoepidermoid squamous cell carcinoma”, usa ka talagsaong matang sa kanser.
Apan, niadtong Oktubre 29, na-stroke ang komedyante, nga miresulta sa kadaot sa tuo nga bahin sa iyang utok.
Ang pamilya sa komedyante mihangyo pag-usab alang sa bisan unsang pinansyal nga tabang nga mahimong ihatag kanila.
Nakig-alayon usab sila sa mga ahensya sa gobyerno, mga organisasyon nga naghatag og tabang, ug mga pribadong indibidwal aron masiguro nga magpadayon ang iyang medikal nga pagtambal.
