PROVINCE OF CEBU- Nasikop na ang usa sa duha ka lalaki nga gituohang nagsunog sa mga stall nga namaligya og pabuto sa Barangay Minolos, lungsod sa Barili, Cebu niadtong Disyembre 28, 2025.
Giila ang nadakpan nga suspek nga si Jonathan Matosada, 43 anyos, residente sa Barangay Poblacion, Barili, apan lumad nga taga Barangay Toko, Binanuagan, Negros Oriental.
Sumala sa imbestigasyon, ang duha ka suspek maoy gituohang hinungdan sa sunog human sila midagkot og triangle firecracker ug gilabay kini duol sa mga gipang-display nga pabuto, nga miresulta sa sunog nga nakaguba sa siyam ka improvised nga stall.
Nadakpan si Matosada pasado alas 4 sa hapon niadtong Lunes, Disyembre 29, 2025, sa iyang pinuy-anan sa Barangay Poblacion. Siya karon nag-atubang og kasong reckless imprudence resulting in damage to property.
Usa ka hiniusang imbestigasyon sa Bureau of Fire Protection (BFP) Barili ug sa Barili Municipal Police Station ang nagbutyag nga sa wala pa mahitabo ang sunog, usa ka motorsiklo ang miabot nga may sakay nga duha ka lalaki.
Gikataho nga nanaog ang backrider ug mipalit og triangle firecracker gikan sa usa ka stall. Human niini, iyang gidagkotan ang pabuto ug gilabay kini duol sa mga gipang-display nga pabuto, nga gibanabana nga mga usa ka metro ang gilay-on.
Pagbuto sa firecracker, mikatap ang mga tipik ug gituohang mitugpa sa mga pabuto, nga maoy direktang hinungdan sa pagsugod sa sunog.
Padayon usab ang pakig-alayon sa kapulisan ug sa BFP sa Land Transportation Office (LTO) Central Visayas aron mailhan ang tag-iya sa motorsiklo, samtang gisubay usab ang CCTV footage sa maong lugar nga mitudlo sa duha ka suspek.
