Gidakop sa kapulisan ang siyam ka mga enforcer sa Land Transportation Office (LTO)-Caraga Region sa usa ka entrapment operation nga gihimo sa Brgy. Alubijid, Buenavista, Agusan del Norte gahapong adlawa.
Sumala sa mga awtoridad, nadakpan ang mga enforcer tungod sa giingong pagpangilkil og kwarta gikan sa mga motorista ug mga biyahero atol sa ilang mga operasyon sa kadalanan.
Gihimo ang operasyon human makadawat og mga reklamo gikan sa mga apektadong motorista bahin sa giingong modus operandi sa mga personahe sa LTO.
Sumala sa LTO Central Office, dugay na nga adunay mga reklamo batok sa pipila ka mga personahe bahin sa pagpangayo og kwarta gikan sa mga motorista atol sa mga inspeksyon ug pag-aresto sa mga nakalapas sa balaod trapiko.
Sa pagkakaron, nagpadayon ang imbestigasyon sa mga awtoridad aron mahibal-an ang gilapdon sa operasyon ug uban pang posibleng mga partisipante sa nahisgutang kalihokan.
