Nakit-an ang patay’ng lawas sa usa ka Australian National sulod sa iyang gi-estaran nga pension house sa FB Cabahug St., Brgy. Guizo, Dakbayan sa Mandaue, sayo sa buntag sa Bag-ong Tuig, Enero 1, 2026.
Ang biktima nailhan nga si Kevin Parrat, legal ang panuigon, kinsa temporaryong nagpuyo sa Room 212L sa Maanyag Pension. Nadiskubrehan ang lawas sa biktima sa alas 5:30 sa buntag, apan opisyal kining na-report sa kapulisan sa alas 10:30 na sa buntag.
Sa gihimong on-the-spot investigation sa mga personahe sa PS1 Mandaue City Police Office (MCPO), napalgan ang biktima nga naghigda sa iyang katre nga anaa na sa “advanced state of decomposition” o nagsugod na sa pagkadunot. Tungod sa kahimtang sa lawas, daling nakig-alayon ang kapulisan sa MCFU7 aron maproseso ang crime scene ug masusi ang palibot sa maong lawak.
Sa pagkakaron, nagpadayon pa ang gihimong imbestigasyon sa mga awtoridad aron matino kon unsay tinuod nga hinungdan sa kamatayon ni Parrat. Wala pa’y gihatag nga dugang impormasyon ang kapulisan kon duna ba’y foul play nga nalambigit sa maong hitabo samtang nagpaabot pa sa resulta sa forensic examination.
