Naluwas na ang dul-an sa 61 ka mga Koreano niadtong Domingo sa hapon, Enero 4, 2026, human ang ilang motorized banca nga MBCA Black Pearl , nakasinati og kakulian sa makina sa San Vicente, Olango Island.
Sumala sa Coast Guard, ang barko nadaot human sa kusog nga hangin ug mabaloron nga kahimtang sa dagat nagduso niini ngadto sa mabaw nga bahin sa katubigan, nga miresulta sa pagkabuslot sa likod nga bahin sa hull sa ubos sa waterline niini.
Dali usab nga mipahigayon og rescue operations ang mga sakop sa Coast Guard gikan sa Olango sub-station, uban sa mga yunit gikan sa Lapu-Lapu City ug sa Olango Maritime Police.
Gibalhin usab ang mga pasahero ngadto sa luwas nga bahin gamit ang lima ka speedboat ug usa ka motorized banca ug daling gidala sa baybayon sa Barangay Maribago, Lapu-Lapu City.
Gikumpirmar usab sa buhatan nga ang tanan nga mga pasahero luwas ra ug walay gitaho nga mga naangol o casualties.
Sapagkakaron, Nagpabilin nga naglutaw ang Black Pearl duol sa lugar sa insidente ug gilauman nga guyoron kini ngadto sa luwas nga lugar kon ugaling ang kahimtang sa dagat ug lebel sa tubig mo-ubos na.
Samtang sa pikas bahin, nakasinati usab og bati nga panahon og kusog nga paghapak sa balud ang pipila ka bahin sa Probinsya sa Sugbo, partikular na sa bahin sa Santa Fe Port, hinungdan nga gikanselar ang mga biyahe sa mga gagmayng sakyanang pandagat lakip na ang mga lugar sa; Daanbantayan, Medellin, Madridejos, Bantayan, Malapascua, og Bogo City.
