CEBU CITY- Gi-institutionalize na sa Kagamhanang Lalawigan sa Sugbo ang Adopt-a-Farm program niini nga nagtinguha sa pagpalambo sa agricultural recovery, food security, ug malungtarong agri-fishery development sa probinsya.
Kini napasar pinaagi sa executive order diin ang kagamhanang lalawigan kay pormal nga nag-adopt sa mga inisyatiba sa kasamtangang administrasyon isip kabahin sa Cebu Agricultural Economic Recovery Framework ubos sa Kumbati Cebu Task Force.
Nakadesinyo kini sa pagpadali sa rehabilitasyon sa mga umahan nga naapektohan sa nakalabayng 6.9 magnitude nga linog niadtong Septiyembre 2025 ug sa Bagyong Tino niadtong Nobyembre 2025 nga nakabalda sa produksyon, irigasyon, ug panginabuhi sa probinsya.
Ubos niini, ang mga alyadong pampubliko ug pribadong sektor lakip ang mga civic groups, academic institutions, ug development partners sa pagdani og direktang suporta sa mga umahan ug ubang agricultural zones.
Ang suporta kay naglakip sa land clearing ug rehabilitasyon, probisyon sa lisu, patambok sa yuta, ekipo, irigasyon, farm road repairs, pag-deploy sa teknolohiyang pang-agrikultura, ug access sa financing ug insurance.
Gidirektahan ang tanang buhatan sa Kapitolyo ug component local government units nga itakso ilang mga plano, programa, ug pundo sa conservation ug development strategies sa Provincial Agriculture and Fishery Conservation and Development Council (PAFCDC).
