Nagpadayon sa ika-unom nga adlaw ang gilusad nga search, rescue, and retrieval operation sa mga awtoridad sa nahitabong makalilisang nga midahiling buntod sa basura sa pribadong landfill facility sa Barangay Binaliw ning dakbayan sa Sugbo.
Sumala sa eksklusibong pakighinabi sa Bombo Radyo Cebu News Team kang Senior Fire Officer 1 Fulbert Navarro, kinsa maoy Safety Officer sa Special Rescue Force Bureau of Fire Protection Central Visayas (BFP-7) nga ang ilahang buhatan nakapadeploy sa 51 ka mga rescue personnel sa maong dapit karong adlawa gawas pa kini sa ihap sa mga augmented forces gikan sa PH Army, PH Navy, PH Air Force, PH Coast Guard, Philippine National Police, Bureau of Jail Management and Penology ug sa duha ka pribadong mining company nga nakabase sa Sugbo nga gibahin sa pipila ka mga teams aron mas mapalapad pa operasyon.
Sumala pa niini nga nagkalisod sila tungod sa ka sensitibo malihok sa mga debris ilabi na tong mga steel beams sa istrukturang natabunan diin posibleng makarisgo kini sa mga biktimang ugkaton og mismong sa kinabuhi sa mga rescue personnel.
Laing balakid nga gisagubang sa mga rescue personnel ang mga suhestiyon sa mga tagtungod nga naka-apektar sa objectivity sa ilang protocol nga gisunod tungod ra sab sa masabtang nga emosyonal nga kahimtang hinungdan nga nagpasidaan sila nga mudistansya lang una aron mabuhat sa mga tigluwas ang pag-ukat sa mga natabunan.
Wala giwala sa mga rescuers ang posibleng milagro kung makakuha pa sila og buhi nga biktima bisan pa man nga sa kasamtangan anaa na sa ika-unom nga adlaw sukad sa panghitabo niadtong Enero 8.
Gani sa pinakabag-ong impormasyon nga gihatag sa BFP-7 niadtong alas 12:31 sa udto karong Miyerkules, Enero 14 kay miabot na ang ihap sa mga nangamatay sa 18 ug ang nagpabiling missing kay anaa nalang sa 18 diin duha sa pinakabag-ong naugkat kay kasamtangan gipailawom pa og identification process.
