CEBU CITY- Giinsistir ni Senador Erwin Tulfo nga ang Environment Management Bureau ng Department of Environment and Natural Resources (DENR-EMB) angay manubag sa pagkahugno sa landfill sa Barangay Binaliw, Cebu City niadtong Enero 8 nga nakapatay og 36 ka tawo.
Matod sa Senador, tataw nga adunay pagpasagad o negligence sa bahin sa departamento sa pagdumala sa mao nga dapit.
Gikondena ni Tulfo ang pagtugot sa pagtukod og istruktura sa tiilan mismo sa “bukid sa basura,” nga sumala pa niya, usa ka klaro nga peligro sa kaluwasan.
Matod ni Tulfo atol sa iyang pagbisita sa mga biktima niadtong Domingo, nga kini nga trahedya malikayan unta ug ang mga biktima buhi pa kon ang mga awtoridad nangilabot lang sa saktong panahon.
Tungod niini, maglunsad og imbestigasyon ang Senate Committee on Social Justice and Rural Development aron sutaon kinsay angay manubag ug aron dili na masundan ang maong insidente.
Sa pagkakaron, nakig-alayon na ang opisina sa Senador sa DSWD alang sa dinalian nga burial assistance, medical aid, ug panginabuhian alang sa mga naapektuhang pamilya.
