Gikuwestiyon ni Cebu City Councilor Joel Garganera, ang gisugyot sa kagamhanan sa Dakbayan sa Sugbo nga posible nang makalabay pagbalik sa basura ang siyudad ngadto sa Binaliw landfill nga gipanag-iya sa Prime Waste Solutions.
Matud ni Garganera nga nasayud siya sa gisagubang sa dakbayan sa Sugbom hilabi na sa pagpangita sa igong kalabayan sa basura lakip na ang kamahal sa pagpalabay niini ngadto sa Lungsod sa Aloguinsan nga mokabat sa sobra P4 milyones.
Gikuwestiyon sa opisyal kung luwas ba ang ang pag-operate niini ngadto pagbalik sa Binaliw, taliwala sa mga trahedya nga nahitabo nga nakakalas og 36 ka kinabuhi sa mga tawo niadtong Setyembre 30, 2025.
Usa sa mga gidudahan sa opisyal ang stability sa mismong istruktura sa landfill, ug ang pagporma sa Monitoring Team niini nga matud pa gipangulohan sa Environmental Management Board-7 (EMB-7) ubos sa Deparment of Environment and Natural Resources (DENR), lakip sa mga miyembro sa mismong monitoring team mao ang Prime Waste Solution, CENRO ug usa ka Non-Governmental Organization.
Gibutyag ni Konsehal Garganera, nga kinahanglang masuta una sa kagamhanan kung luwas ba ang pagpalabay sa mga basura sa mismong pasilidad, ug midugang nga kinahanglan nga adunay representasyon sa Office of the Building Official (OBO) ug City Engineering Office aron mahibaw-an ang limitasyon ug kapasidad niini.
Gilauman nga sa mga musunod nga semana, mahimo na nga makalabay pagbalik sa basura ang dakbayan sa Sugbo sa pribadong landfill nga nahimutang sa Barangay Binaliw Dakbayan sa Sugbo.
Kini matud ni Cebu City Mayor Archival nga sa pinaka uwahing meeting niini kauban ang Department of Environment and Natural Resources (DENR)-7 , nahisgutan ang kabahin sa mga angayang sundon aron nga makalabay na og balik sa maong landfill.
