Nisang-at og kasong kriminal ang Securities and Exchange Commission batok sa Villar Land Holdings Corp. ug sa mga senior officials niini, lakip na ang pamilya ni kanhi Senador Manny Villar, tungod sa mga alegasyon sa market manipulation ug insider trading.
Sa reklamo sa SEC, lakip sa ginganlan nga mga respondents mao sila si Manny Villar Jr., kanhi Senador Cynthia Villar, ug ang ilang mga anak nga sila si Manuel Paolo, Mark, ug Camille Villar.
Sumala sa komisyon, ang kaso naggikan sa giingong malimbongon nga pinansyal nga pagbutyag sa kompanya niadtong 2024 nga nagpaburot sa kinatibuk-ang asset niini ngadto sa P1.33 trilyon, apan ang usa ka audit nagbutyag nga kini P35.7 bilyon lamang.
Ang mga kaalyado nga kompanya nga Infra Holdings Corp. ug MGS Construction giakusahan usab sa paghimo og artipisyal nga demand aron mapaburot ang presyo sa ilang mga stock.
Si Camille Villar nag-atubang usab og mga kaso sa insider trading human giingong nakapalit og liboan ka shares sa wala pa ang usa ka dakong anunsyo sa kompanya niadtong 2017.
Gipasiugda ni SEC Chairperson Francis Lim nga dili nila itugot ang bisan unsang malimbongon nga mga buhat nga makalimbong sa mga tigpamuhunan ug makadaot sa integridad sa merkado sa Pilipinas.
