Nagsang-at og mga kasong kriminal ug administratibo ang Office of the Ombudsman, pinaagi ni Assistant Ombudsman Atty. Mico Clavano, batok kang kanhi DPWH Secretary Mark A. Villar, kinsa usa sa mga “beneficial owner” sa Prime Water Infrastructure Corporation ug Prime Assets Ventures Inc.
Lakip usab sa mga pasakaan og reklamo mao sila si Manuel B. Villar Jr., Cynthia A. Villar, Camille A. Villar, Manuel Paolo Villar, Fe Rebrancos—Presidente sa PWIC, Romeo Sabater —Vice President sa PWIC, Enrico Pasumbal—General Manager sa Quezon Metropolitan Water District, Guillermo T. Pili —General Manager sa San Pedro Water District, ug Juliet Ocampo —General Manager sa Trece Martires City Water District.
Gawas kanila, ang reklamo naglakip usab sa lima ka miyembro sa Joint Venture Selection Committee (JVSC) ug lima ka miyembro sa board sa Quezon Metropolitan Water District; diin unom ka miyembro sa JVSC ug duha ka miyembro sa board sa San Pedro Water District; ug lima ka miyembro sa JVSC ug unom ka miyembro sa board sa Trece Martires City Water District.
Ang mga kaso naglambigit sa mga paglapas sa Sections 3(e) ug 3(g) sa Republic Act No. 3019, o ang Anti-Graft and Corrupt Practices Act.
Matod ni Atty. Clavano, napirmahan na ang report sa fact-finding investigation ug ang reklamo, ug opisyal na nga misulod ang kaso sa yugto sa preliminary investigation.
