Gipasalig sa Office of the Ombudsman nga hatagan og higayon ang pamilyang Villar nga depensahan ang ilang kaugalingon atubangan sa mga administratibo ug kriminal nga kaso nga gipasaka batok kanila.
Matod ni Assistant Ombudsman Atty. Mico Clavano, anaa pa sa yugto sa pasiunang imbestigasyon o preliminary investigation ang mga pasangil, diin magpabilin ang hustong proseso o due process alang sa tanang nalambigit.
Pormal nga gipasaka sa Ombudsman kagahapon ang duha ka ihap sa paglapas sa Anti-Graft and Corrupt Practices Act batok nila Sen. Mark Villar, Sen. Camille Villar, Cynthia Villar, Manny Villar, ug uban pa.
Ang mga pasangil naggikan sa isyu sa dili maayong kalidad ug kulang nga suplay sa tubig sa PrimeWater Infrastructure Corporation, human nadiskobrehan ang giingong “hilabihan ka makadaot” o ‘grossly disadvantageous’ nga joint venture agreement tali sa kompanya ug lokal nga water district.
Sa ilang bahin, gipahayag sa pamilyang Villar nga gipreserbar nila ang pagrespeto sa legal nga proseso ug motubag sila sa tukmang panahon.
Samtang gipadayon hinuon sa Ombudsman ang ilang pasalig nga hugot nga ipatuman ang imbestigasyon bisan pa sa posisyon o estado sa mga akusado.
