Nagmando ang Sandiganbayan Sixth Division og 90 ka adlaw nga preventive suspension batok kang Uswag Ilonggo Party-list Representative James “Jojo” Ang Jr. may kalabotan sa kasong graft nga iyang giatubang sa maong korte.
Subay sa Section 13 sa Republic Act No. 3019, o ang Anti-Graft and Corrupt Practices Act, mandatory o gikinahanglan ang pagpahamtang og suspensyon sa bisan unsang opisyal sa gobyerno nga nag-atubang og pormal ug awtorisadong mga kaso sa korapsyon samtang nagpadayon ang husay.
Ang kaso naggikan sa 14 counts sa graft nga gipasaka sa Office of the Ombudsman human ang imbestigasyon nagbutyag sa iyang giingong pinansyal nga interes sa mga kontrata sa Department of Public Works and Highways (DPWH) pinaagi sa iyang katungdanan isip stockholder ug sa iyang koneksyon sa duha ka kompanya.
Sumala sa prosekusyon, ang Article VI, Section 14 sa 1987 Constitution hugot nga nagdili sa mga miyembro sa Kongreso nga adunay direktang interes o makakuha og benepisyo gikan sa bisan unsang kontrata sa gobyerno samtang anaa sila sa katungdanan.
Kining preventive suspension dili giisip nga silot, kondili usa ka legal nga lakang aron masiguro nga dili magamit sa opisyal ang iyang posisyon aron impluwensyahan ang mga saksi ug ebidensya samtang gihusay ang kaso.
