Nagpasidaan ang Office of the Ombudsman sa mga opisyal sa gobyerno batok sa paggamit sa alokasyon sa gasolina nga gipondohan sa gobyerno alang sa ilang mga pribadong sakyanan.
Sumala ni Ombudsman Jesus “Boying” Remulla, ang maong mga buhat makadaot sa imahe ug integridad sa gobyerno.
Gipasabot ni Remulla nga dili pasagdan sa iyang ahensya ang mga kalapasan, lakip ang pagkuha o pag-ilog sa gasolina nga alang sa opisyal nga paggamit, pagpuno og gasolina sa mga sakyanan nga dili sakop sa gobyerno, ug pagpalsipikar sa mga resibo aron tabonan ang maong mga buhat.
Gipasidan-an usab niya nga ang bisan kinsang opisyal sa gobyerno nga mapamatud-ang nakahimog maong mga kalapasan mahimong mag-atubang og bug-at nga administratibo o legal nga silot, subay sa balaod.
Gipagawas ni Remulla ang maong pasidaan human sa pagtangtang sa katungdanan ni Bohol Provincial Board Member Vierna Mae Boniel-Maglasang tungod sa two counts of serious dishonesty.
Gipasiugda sa Ombudsman nga ang pondo ug mga kagamitan sa gobyerno kinahanglan gamiton lamang alang sa opisyal nga katuyoan, ug dili alang sa personal nga interes sa mga opisyal.
