Giisyuhan og bag-ong warrant of arrest si kanhi Bamban, Tarlac Mayor Alice Guo may kalabotan sa tulo ka kaso sa paglapas sa Republic Act No. 3019 o kon Anti-Graft and Corrupt Practices Act.
Ang warrant gi-isyu sa Pasig Regional Trial Court Branch 67, ug apil sa kaso ang laing 11 ka indibidwal kon diin nagtakda ang korte og P90,000 nga piyansa alang sa matag kaso.
Sa pagkakaron, nagtingkagol si Guo sa Correctional Institution for Women sa Mandaluyong City human siya nahukman nga guilty sa Pasig court sa kasong qualified human trafficking ug nasentensiyahan og reclusion Perpetua kon tibuok kinabuhing pagkabilanggo.
Gawas kang Guo, gihukman usab og life imprisonment ang iyang mga kauban sa kaso nga sila Rachelle Malonzo Carreon, Jaimielyn Cruz, Walter Wong Rong, Wang Weili, Wuli Dong, ug Nong Ding Chang.
Gimandoan usab sila nga mobayad og P2 milyon nga multa sa matag-kaso.
Gimando usab sa korte ang pagkumpiska sa P6-bilyon nga Baofu compound, ingon man ang permanente nga pagbawi sa registration sa Baofu Land Development Inc., Hongsheng Gaming Technology Inc., ug Zun Yuan Technology Inc.
