Gibutyag sa Office of the Ombudsman nga ang kanhi House of Representatives Speaker Martin Romualdez giingong misulay sa pagbiya sa nasud sa makadaghang higayon.
Atol sa usa ka press conference nga gihimo sa Tanodbayan, si Assistant Ombudsman Atty. Mico Clavano mismo ang mibutyag niini.
Miingon siya nga base sa ilang kasaligang ‘intelligence reports’, ang kanhi House Speaker giingong wala mohunong sa pagsulay sa pagbiya sa Pilipinas.
Kini bisan pa ug adunay kasamtangang Precautionary Hold Departure Order batok kaniya nga gi-isyu sa Sandiganbayan.
Subay niini, sumala ni Ombudsman Spokesperson Mico Clavano, nanawagan sila sa mga ahensya sa gobyerno nga sigurohon nga dili makaikyas ang magbabalaod.
Ang kanhi House Speaker Martin Romualdez karon nag-atubang og mga alegasyon sa wala ug tuo ug pagkalambigit sa mga anomalosong proyekto sa flood control.
Giisip siya sa Office of the Ombudsman nga mao ang giingong ‘central figure’ sa ‘diversion’ sa pondo sa publiko nga unta gigahin alang sa mga proyekto sa pagkontrol sa baha.
Busa, ang mga reklamo sa pagpangawkaw ug paglapas sa Anti-Money Laundering Act batok sa maong magbabalaod gikatakdang ipasaka alang sa pasiunang imbestigasyon sa Tanodbayan.
Ang iyang mga kaubang respondents sa mga reklamo mao sila si kanhi Ako Bicol Partylist Rep. Zaldy Co ug uban pang mga indibidwal nga wala nganli.
Tungod niini, ang Office of the Ombudsman nagpadala ug mensahe sa katawhan nga ilang mapaabot nga ang mga kurakot moatubang sa patas ug bug-os nga gibug-aton sa balaod.
