Maningkamot nga makasugod og maayo sa iyang Middle East swing sa Abu Dhabi Open ang Filipina tennis star nga si Alexandra “Alex” Eala, diin iyang atubangon ang pamilyar nga kontra nga si Zeynep Sonmez sa Turkey sa Round of 32 nga gikatakda sa Lunes.
Dili bag-o si Sonmez kang Eala. Kaduha na silang nagkita sa singles competition atol sa ilang ITF days, ug parehong natapos sa kadaugan para sa Filipina.
Una silang nagkita sa ITF France 22A niadtong Nobyembre 2023, gisundan sa rematch sa Eastbourne Open niadtong Hunyo 2024, diin si Eala midaog pag-usab.
Nag-atbang usab ang duha isip doubles opponents sa ITF Luxembourg niadtong Nobyembre 2023 ug sa ITF Slovakia niadtong 2024, nga nagpalig-on sa ilang pagka-pamilyar sa usag usa.
Gawas sa singles, si Eala makigkompetensya usab sa doubles event, diin iyang kauban ang iyang kaubang Southeast Asian standout nga si Janice Tjen.
Sa ilang unang duwa, ilang atubangon ang duo nga sila si Leylah Fernandez sa Canada, kinsa adunay kaliwat nga Pilipino, ug Kristina Mladenovic sa France.
Naabot ni Eala ang kinapungkayan sa kalampusan pinaagi sa usa ka makasaysayanong homecoming sa Philippine Women’s Open, diin siya nakigtigi alang sa Pilipinas sa unang higayon.
