Gipahibalo sa Malacañang nga nabalaka si Presidente Ferdinand “Bongbong” Marcos Jr. sa posibleng epekto sa mga reklamo sa impeachment nga gisang-at batok kaniya, dili para sa iyang kaugalingon apan para sa kaayohan sa nasud ug sa ekonomiya.
Sumala ni Palace Press Officer USec. Claire Castro, ang pagsang-at sa reklamo sa impeachment batok sa Presidente adunay halapad nga implikasyon ug mahimong makaapekto dili lamang sa liderato apan lakip na sa kahimtang sa ekonomiya sa nasud.
Gipasiugda ni Casto nga ang Presidente nagpabilin nga masaligon nga wala siyay gibuhat nga sayop, wala’y gilapas nga balaod, ug wala’y nahimo nga impeachable offense, apan nabalaka siya sa epekto sa proseso sa pagsalig sa publiko ug sa ekonomiya.
Sa laing bahin, gipadayon sa Palasyo nga wala kini kalabotan sa pagsang-at sa duha ka reklamo sa impeachment batok kang Bise Presidente Sara Duterte.
Si Castro miingon nga naa na sa Kongreso ang pag-imbestiga ug pagdesisyon niining mga kaso batok sa Bise Presidente.
Si Castro miingon nga halos walay bag-o sa duha ka kaso nga gisang-at batok sa bise presidente, ug kung aduna man, kini anecdotal lamang.
