Gisugdan na sa Kagamhanang Lalawigan sa Bohol ang ocular inspection niini alang sa pagpatuman sa ikatulong taytayan tali sa Tagbilaran ug isla sa Panglao nga gipahigayon dapit sa lungsod sa Dauis niadtong Lunes, Pebrero 9, 2026.
Gipangulohan ang maong inspeksyon ni Bohol Provincial Governor Erico Aris Aumentado kauban si Director Marc Raynal sa Development for Infrastructures sa Centre for Studies and Expertise on Risks, the Environment, Mobility and Urban Planning (CEREMA) sa Embassy of France.
Katuyuan sa maong inspeksyon kay ang pag-evaluate sa kondisyon sa site ug sa pagpalig-on sa koordinasyon sa nagkalain-laing ahensya alang sa hingpit nga pagpatuman sa proyekto.
Tumong sab sa kalihukan mao ang pagsusi sa kaandam sa nasudnong mga ahensya sama sa Department of Public Works and Highways (DPWH) alang sa pagpatuman sa proyekto nga gilaumang nakatampo og kaayuhan sa dakbayan sa Tagbilaran ug islang lungsod sa Panglao ilabi na sa dagan sa trapiko nga nakaapektar sa Bohol-Panglao International Airport.
Gani mipahayag si Raynal nga siya ang mibisita sa lugar aron personal nga masuta ang umaabot dagan sa pagtrabaho sa proyekto nga pagapundo sa ilang buhatan nga gikan sa langyaw nga gobyerno sa Pransya.
