Gipakusog sa Philippine National Police (PNP) ang koordinasyon niini sa ubang mga ahensya sa gawas sa nasud aron masubay ang nahimutangan sa pugante nga negosyante ug giingong mastermind sa missing sabungeros, nga si Charlie “Atong” Ang.
Sumala ni PNP Chief PGen. Jose Melencio Nartatez Jr., ang tumong mao ang pagpugong sa mga lihok ug umaabot nga mga aksyon ni Ang human gitaho nga wala siya sa Cambodia, sukwahi sa nangaging mga pahayag sa Department of Interior and Local Government (DILG).
Samtang, ang National Police ug uban pang mga ahensya sa pagpatuman sa balaod nagpabilin nga komitado sa pagpahigayon ug pagpadayon sa mga operasyon sa manhunt batok kang Ang ug sa iyang mga kaubang pugante.
Lakip usab sa gipalig-on sa seguridad ang mga pantalan, tugpahanan, ug bisan sa mga backdoor sa nasud aron masiguro nga ang pugante nga negosyante dili makasulod sa ubang mga nasud.
