Gibanabana nga moabot sa Php 3,900,000.00 ang kinatibuk-ang danyos human ang usa ka dakong sunog naugdaw sa 52 ka mga panimalay sa J. Panis St., Sitio Univille, Brgy. Kasambagan, Cebu City, kagahapon, Marso 7, 2026.
Ang maong trahedya nikutlo sa usa ka residential area nga mokabat sa 2,600 square meters ang gidak-on sa yuta nga gipanag-iya ni Romeo Sayson.
Tungod niini, moabot sa 70 ka pamilya o 280 ka indibidwal ang nawad-an og kapuy-an, lakip na ang panimalay nga gi-okupar ni Rodney Sayson diin gituohang nagsugod ang kalayo.
Bisan pa man sa kadako sa danyos, swerteng walay kinabuhi nga nakalas sa maong insidente, gawas lamang sa duha ka indibidwal nga nakasinati og minor nga mga samad ug paso.
Subay sa panghitabo, ang kalayo daling nikatap gikan sa 1st Alarm sa alas 2:10 sa hapon hangtod nga niabot kini sa 4th Alarm pagka alas 2:58 sa hapon, hinungdan nga nagtinabangay ang 12 ka BFP fire trucks, duha ka ambulansya, ug napulo ka auxiliary responders aron mapakgang ang pagkuyanap niini.
Samtang ang Cebu City Fire Station ubos sa pagdumala ni FO2 Freddie Pasaol, niresponde sa dapit sulod lamang sa unom ka minuto human madawat ang alarma sa alas 2:04 sa hapon.
Hinungdan nga nakontrolar sa mga bombero ang kalayo pagka alas 3:23 sa hapon ug hingpit nga gideklarar nga fire out pagka alas 4:31 sa hapon.
Sa pagkakaron, ang imbestigasyon nagpadayon pa aron masuta ang tinuod nga hinungdan sa pag-ulbo sa maong sunog.
