Gibutyag ni Rear Admiral Roy Vincent Trinidad, tigpamaba sa Philippine Coast Guard (PCG) para sa West Philippine Sea, niadtong Sabado nga ang giingong mga kalihokan sa pagpaniid sa tulo (3) ka Pilipino para sa China gituyo tungod sa dagkong mga bayad, lakip na ang taas nga sweldo ug dagkong mga bonus gikan sa ilang mga Chinese handler.
Sumala ni Trinidad, ang mga suspek nakakuha og upat ngadto sa unom ka numero para sa impormasyon nga ilang gihatag, ug nakadawat usab sila og dagkong mga bonus.
“The modus operandi are all financial from 4 to 6 digits ang halaga,” matod ni Trinidad.
Nasayran nga ang mga bayad gipadala kanila pinaagi sa digital wallets o food couriers baylo sa impormasyon nga ilang gihatag.
Usa sa mga espiya ang giingong nakombinsir sa dihang nakakita siya og barko sa China nga nabangga sa barko sa PCG, diin daghang mga Pilipinong tripulante niini ang nasamdan.
Giingon usab ni Trinidad nga usa ka opisyal sa navy ang nagtaho sa usa ka pagsulay sa pag-recruit sa usa ka langyaw nga babaye ug nga nagsugod siya sa pagpangayo og sensitibo nga impormasyon.
Ang PCG miingon usab nga ang pagrekrut sa mga Pilipino sa navy nahitabo dungan sa pagkadiskobre sa giingong mga kalihokan sa pagpaniid sa China lakip na ang kaso ni Alice Guo, ang “Palawan 5” nga nag-instalar og CCTV sa palibot sa Ulugan Bay, ug kadtong mga nadakpan sa Grande Island ug Chiquita Island.
Sumala sa National Security Council (NSC), ang operasyon sa mga suspek nahunong na, ug ang tanang mga Pilipino nga nalambigit ilang nailhan human nila madiskobrehi ang ilang sekreto nga komunikasyon gamit ang usa ka gaming app.
Samtang, ang Embahada sa China sa Manila hugot nga mihimakak sa mga pasangil nga ang China kuno nagrekrut og mga Pilipino aron mohimo og mga kalihokan sa pagpaniid sa Pilipinas.
Sumala sa tigpamaba sa Embahada nga si Ji Lingpeng, ang mga pasangil pulos hinimo-himo. Gipasiugda usab niya nga ang China nagsunod sa prinsipyo niini nga dili manghilabot sa internal nga mga kalihokan sa ubang mga nasud.
“We firmly oppose and strongly deplore irresponsible remarks made by certain Philippine agencies peddling so-called ‘Chinese spy’ narratives. China follows the principle of non-interference in other countries’ internal affairs,” ingon ni Ji.
