NAGA CITY,CEBU- Naangol ang dili muminos 16 ka mga indibidwal human nabanggaan sa usa ka awto ang pasaheroang jeep sa nasudnong highway sa Barangay Tuyan, dakbayan sa Naga sa habagatang Sugbo kagahapon sa buntag, Lunes, Marso 9, 2026.
Sumala pa sa inisyal nga imbestigasyon sa City of Naga Police Station, ang panghitabo kay nakuhaan pa og CCTV footage diin kuha sa akto ang pagkabangga sa puwa nga sedan-type nga kotse ngadto sa nagpasakay og pasahero nga jeep nga adunay routang Naga–Basak. Hinungdan nga nakapabalitok kini sa maong multicab-type jeep nga nakapa-angol sa mga pasahero niini diin aduna pay pipila ang na-trap na nabanggang jeep.
Daling gitabang og gidala sa duol nga tambalanan ang mga nangaangol sa panghitabo lakip na ang drayber sa awto nga giilang si Willjun Deresas Calago, 49-anyos.
Giila ang laing mga sakay sa awto nga pamilya ni Calago nga sila, Josephine Calago, 65-anyos, William Calago, 66-anyos; og usa ka 5-anyos nga bata. Samtang angol sab ang mga pasahero sa jeep nga sila Jomar Cabalquinto, 48-anyos; Danilo Bacus, 61-anyos; Reynaldo Abaquita, 36-anyos; Zaldy Secretaria, 67-anyos; Mary Lariosa Antonino; usa ka 16-anyos nga dalagita ug ang drayber nga si Rogelio Omambac Jr., 49-anyos.
Laing mga naangol kay ang mga pedestrian nga sila si Eddie Niño Alabi, 23-anyos; Phoebe Manliguez, 30-anyos ug mga batang gagmay niini nagpangedad og 11, sais, ug dos anyos.
Daling gitabang og gidala sa duol nga tambalanan ang mga biktima aron madalitan og atensyong medikal.
Matod pa nga ang hinungdan sa pagbangga sa awto ngadto sa jeep kay ang mechanical failure sa habig sa awto diin sumala pa sa drayber kay nikalit lang og ungot ang manobela hinungdan nga mulahos kini sa pikas lane.
Kasamtangang balhog sa kustodiya sa kapulisan ang drayber diin miangkon kini sa kasaypanan nga nakamugna sa insidente. Mag-atubang kini sa reklamong reckless imprudence resulting in multiple physical injuries ug damage to property.
