Nanawagan si Mandaue City Mayor Thadeo Jovito “Jonkie” Ouano og mas lig-on nga koordinasyon taliwala sa mga lokal nga kagamhanan sa Metro Cebu aron sulbaron ang nagpadayong hagit sa pagdumala sa basura, diin iyang gipasiugda nga dili makaya sa usa lang ka siyudad ang pagsulbad niini.
Atol sa gipahigayong environmental summit sa Provincial Government of Cebu niadtong Huwebes, Marso 19, 2026, gipadayag sa mayor nga ang pagdumala sa basura usa sa labing bug-at nga palas-anon nga giatubang sa mga local government units (LGUs).
Sa pagkakaron, mokabat sa 318 ka tonelada nga basura ang giproseso sa Mandaue City matag adlaw, ug nasinati sa siyudad ang pagtriple sa ilang galastuhan sa paghakot human sa landslide sa Barangay Binaliw.
Bisan pa sa mga kalisdanan, gipakita sa siyudad ang pag-uswag pinaagi sa pagpatuman sa Solid Waste Diversion Program nga nakatabang sa pagkunhod sa gidaghanon sa basura nga madala sa mga landfill.
Dugang pa sa mayor nga ang problema sa kalikupan dili mo-ila og utlanan sa politika, busa gikinahanglan ang usa ka hiniusa nga pamaagi sa tanang LGUs, ug isip long-term nga solusyon, gisugyot niya ang pagtukod og komon nga sanitary landfill alang sa Metro Cebu.
Gawas sa imprastraktura, gipunting usab sa kagamhanan sa dakbayan ang pag-edukar sa kabataan pinaagi sa pag-apil sa waste management sa kurikulum sa mga tunghaan aron mapanday ang disiplina sa paglabay og basura.
Gitambongan ang maong summit sa mga dagkong opisyal sa probinsya ug mga mayor sa Metro Cebu aron paghisgot sa hiniusang lakang alang sa mas limpyo ug malungtarong Sugbo.
