Naglatid og duha ka legal nga basehan ang legal counsel sa extrajudicial killings (EJKs) ug human rights lawyer Neri Colmenares sa International Criminal Court (ICC) aron ipadayon ang imbestigasyon ug posibleng husay batok kang kanhi President Rodrigo Duterte, bisan pa man og miatras ang Pilipinas gikan sa Rome Statute niadtong 2019.
Una, sumala sa abogado, ubos sa Article 127, ang nasud nagpabilin nga obligado sa mga kaso nga gisugdan samtang kini miyembro sa Rome Statute, lakip na ang preliminary examination nga gilunsad niadtong 2018.
Ikaduha, ang abogado miingon nga ang gobyerno miila sa hurisdiksyon sa ICC pinaagi sa mga aksyon niini, lakip na ang pagsumite sa mga dokumento niadtong 2021 ug 2022 nga naghangyo sa paglangan sa imbestigasyon.
Bisan pa, si Atty. Colmenares nagpasidaan nga ang pagdapig sa kampo ni Duterte mahimong magdasig sa ubang mga lider nga malikayan ang tulubagon pinaagi sa pag-atras gikan sa ICC.
Samtang, ang mga pamilya sa mga biktima nanumpa nga ipadayon ang ilang pakigbisog alang sa hustisya.
Ugma, Abril 22, mga alas 11 sa buntag, oras sa The Hague o alas 5 sa hapon, oras sa Pilipinas, gilauman nga mopagawas ang ICC Appeals Chamber sa ilang katapusang desisyon sa apela sa mga abogado ni kanhi presidente Rodrigo Duterte bahin sa isyu sa hurisdiksyon sa korte sa iyang kasong crimes against humanity.
