PROVINCE OF CEBU- Padayong nakasinati og “haze” conditions ang pipila ka bahin sa Metro Cebu sukad Abril 17, tungod sa napundok nga pollutants gikan sa mga lokal nga emisyon sa mga sakyanan, abog sa dalan, ug mga nakalabayng sunog nga gipasamot pa sa uga ug init nga panahon diin hamubo nga haguros sa hangin ang nasinati.
Base sa monitoring data gikan sa Environmental Management Bureau Central Visayas (EMB Central Visayas), ang kalidad sa hangin kay nagpabiling anaa sa “unhealthy level,” buot pasabot, ang indibidwal posibleng makasinati sa kakulian sa panglawas ilabi na ang mga bata, katiguwangan, ug mga indibidwal nga adunay kondisyon sa pagginhawa.
Subay niini, si Gobernador Pamela Baricuatro nagmando og mas hugot nga koordinasyon sa Department of Environment and Natural Resources (denr), diin gitahasan nga maghatag og updated reports, ug ingun man sa Civil Defense, ug uban pang ahensya alang sa mga update ug rekomendasyon, basi sa gikabutyag ni Ainjeliz dela Torre-Orong, ang Provincial Information Officer sa Cebu Province, atol sa eksklusibong pakighinabi sa Bombo Radyo Cebu kaniya.
Apan, gitataw ni Orong nga ang hugot nga kamandoan ni Gov. Baricuatro,
sa pag-activate sa Emergency Operations Center ubos sa Provincial Disaster Risk Reduction and Management Council, samtang naka-heightened alert ang mga district hospitals, taliwala sa nagpadayon nga monitoring.
Ingun man nga bisan pa nga ni arang-arang na ang kondisyon sa hangin basi sa monitoring data sa Environmental Management Bureau Central Visayas (EMB Central Visayas), gi-awhag gihapon niini ang mga residente nga magpabilin sa sulod sa balay kung mahimo, ug magsuot og N-95 mask kung kinahanglan mogawas.
Sa pagkakaron, wala pay na tala nga kasong may kalabotan sa haze, apan padayon ang pagmonitor tungod sa peligroso gihapon nga lebel sa polusyon.
