Gihagit ni Rep.Terry Ridon, Chairman sa House Committee on Public Accounts ug Bicol Saro Party-list Rep., si Davao City Rep. Paolo ”Pulong” Duterte nga magpresentar og ebidensya kabahin sa iyang pasangil nga ang mga kongresista mawad-an og pondo kon dili mosuporta sa impeachment complaint batok kang Bise Presidente Sara Duterte.
Matod ni Ridon, kinahanglan nga suportahan ni Rep. Duterte ang iyang mga pamahayag og konkreto nga pruweba imbes nga mag-akusar lang pinaagi sa social media.
Gihagit usab niya si Duterte nga ipakita ang iyang baruganan pinaagi sa aktibong pagdepensa sa impeachment complaint sa plenaryo sa House of Representatives, ug gikuwestiyon ang giingong kanunay nga pag-absent niini sa mga sesyon ug plenaryo.
Ang mga pahayag ni Ridon gihimo human sa post ni Rep. Duterte sa social media nga nag-ingon nga adunay giingong hulga sa pondo batok sa mga distrito sa mga kongresista nga dili mobotar pabor sa impeachment complaint ni VP Sara Duterte.
