CEBU, PHILIPPINES- Opisyal na nga gibuksan ang 48th ASEAN Summit sa Lapu-Lapu City niadtong Biyernes, Mayo 8, uban sa pagtambong sa mga lider ug representante gikan sa tanang miyembrong estado sa ASEAN regional bloc.
Gipasalamatan ni Pres.Ferdinand Marcos Jr. ang mga lider sa Southeast Asia sa ilang presensya sa summit sa Sugbo, bisan pa sa nagkalain-laing hagit nga giatubang sa ilang tagsa-tagsa ka nasod.
Sa iyang opening remarks, gihulagway sa Presidente ang Cebu isip usa ka makasaysayan nga sentro sa patigayon ug koneksyon sa rehiyon sukad pa sa karaang panahon. Iyang gipahinomdoman usab nga didto sa Cebu gipirmahan kaniadtong 2007 ang Cebu Declaration nga nahimong pundasyon sa ASEAN Charter.
Gipakita ni Marcos ang kasamtangang kahimtang sa rehiyon, ilabina sa nagkagrabeng tensyon sa Middle East nga nakaapekto sa ekonomiya ug seguridad sa Southeast Asia. Tungod niini, iyang gipadayag nga napugos ang Pilipinas sa pagpaminos sa pipila ka aktibidad sa ASEAN chairmanship ug pagbalhin sa ubang meetings ngadto sa virtual setup aron matubag ang epekto sa global crisis.
Bisan pa niini, gipasiugda sa Presidente nga magpadayon ang ASEAN sa pagtinabangay aron mapalig-on ang ekonomiya, seguridad, agrikultura, ug enerhiya sa rehiyon. Iyang gidasig ang mga miyembrong nasod nga magpabiling nagkahiusa, nga matud pa niya, ang kusog sa ASEAN dili nagagikan sa pagkapareho kondili sa panaghiusa.
Gitapos ni Marcos ang iyang mensahe pinaagi sa pag-awhag sa mga lider nga magtinabangay sa pag-navigate sa kaugmaon sa rehiyon pinaagi sa kalinaw, kauswagan, ug people empowerment.
