Nagpadala og mensahe sa pagtimbaya si Vice President Sara Duterte alang sa tanang inahan sa pagsaulog sa Adlaw sa mga Inahan, diin iyang giila ang ilang sakripisyo, gugma, ug kalig-on sa pag-atiman ug pagpadako sa ilang mga pamilya.
Sa iyang pahayag, gipasiugda sa Bise Presidente ang espesyal nga papel sa mga inahan sa paghulma sa kinabuhi sa ilang mga anak, lakip na ang mga Overseas Filipino Workers (OFWs) nga nag-atubang sa kalisod sa panagbulag aron mahatagan og mas maayong kaugmaon ang ilang pamilya.
Sa laing bahin, nagpadala usab og mensahe si Presidente Ferdinand Marcos Jr., diin iyang giila ang mga inahan isip haligi sa panimalay ug pundasyon sa lig-on nga komunidad.
Matud sa Presidente, “sa matag inahan, adunay gugma ug sakripisyo nga dili matumbasan sa bisan unsang pulong,” ug iyang gipadayag ang iyang pasalamat sa ilang walay puas nga pag-amuma ug dedikasyon sa pamilya ug nasod.
Gipasiugda usab niya nga pinaagi sa pag-atiman ug paglaum sa mga inahan, nagmalig-on ang mga panimalay ug ang mas lapad nga katilingban.
