Miabot na sa Pilipinas ang unang grupo sa 34 ka Overseas Filipino Workers (OFWs) gikan sa Saudi Arabia human matabangan sa Overseas Workers Welfare Administration (OWWA) ug Department of Migrant Workers (DMW) sa paghan-ay sa ilang pagpauli tungod sa mga kanselasyon ug pagkalangan sa mga biyahe sa eroplano sa Riyadh.
Miabot ang mga OFW sa Ninoy Aquino International Airport (NAIA) Terminal 3 Lunes, Oktubre 19, sakay sa Qatar Airways flight QR934 gikan sa Doha.
Matod ni OWWA Administrator Patricia Yvonne M. Caunan, prayoridad sa ahensiya ang kaluwasan sa mga OFW ug ang paghatag og tukmang impormasyon sa ilang mga pamilya.
Gilaomang mosunod sa pagpauli ang laing 65 ka OFW karong Martes, Oktubre 20.
Lakip niini ang 50 ka mamumuo gikan sa Al Qassim ug 15 ka babaye nga nagpuyo sa Bahay Kalinga sa Dammam, usa ka dangpanan alang sa mga OFW nga nanginahanglan og tabang.
Gipahigayon ang pagpauli subay sa direktiba ni President Ferdinand Marcos Jr. nga unahon ang kaluwasan ug kaayohan sa mga OFW ubos sa Saving Lives nga haligi sa UPLIFT Assistance Program.
Nagpadayon ang koordinasyon sa OWWA, DMW, Philippine Embassy, ug Migrant Workers Office sa Riyadh aron masiguro ang pagpauli sa ubang mga OFW nga nagpaabot nga makabalik sa Pilipinas.
