Nagpadala og pahasubo ang Department of Migrant Workers (DMW) sa mga pamilya sa duha ka Pilipinong seafarers nga namatay human giatake ang Saudi-flagged crude oil tanker nga M/V SIDR samtang nitabok sa Strait of Hormuz niadtong Agosto 31.
Gibutyag ni Department of Migrant Workers (DMW) Secretary Hans Leo Cacdac nga nakatakda siyang mobisita sa mga panimalay ug pamilya sa mga namatayng Pilipinong seafarers.
Bisan pa man niini, gipasabot ni Cacdac nga dili una niya ibutyag ang eksaktong lokasyon kon asa nagpuyo ang maong mga pamilya tungod sa pagrespeto sa ilang “privacy” niining panahon sa kalisod.
Dugang pa sa Kalihim, makapasiguro ang tanan nga ang DMW, kauban ang Overseas Workers Welfare Administration (OWWA), mohatag og bug-os ug komprehensibong tabang sa nahabiling pamilya.
Apil sa ilang pangunang prayoridad mao ang pagpakig-alayon alang sa dinalian nga pagpauli sa mga natala nga minatay sa mga namatay nga seafarers aron mahatagan sila og desenteng pagpahiluna.
