Gihimakak sa Palasyo sa Malacañang ang pasangil ni Senador Imee Marcos nga adunay pagpamugos ug mga hulga batok sa mga magbabalaod aron suportahan ang reklamo sa impeachment batok kang Bise Presidente Sara Duterte.
Sumala ni Palace Press Officer Claire Castro, ang mga akusasyon walay basehanan kung wala kini giubanan og klaro nga ebidensya.
Matud sa sa opisyal sa Palasyo nga ang pipila ka mga personalidad giingong naanad sa naglutaw nga espekulasyon ug intriga imbes nga magbutang og konkreto nga ebidensya.
Sa sayo pa, giingon ni Marcos sa usa ka video statement nga ang pipila ka mga miyembro sa House of Representatives ug Senado nag-atubang og pagpanghadlok ug mga hulga sa mga kaso kung dili nila suportahan ang reklamo sa impeachment batok kang Duterte.
Sumala sa senador, ang pipila ka mga magbabalaod giingong gihulga nga mopasaka og reklamo sa Office of the Ombudsman, samtang ang daghang mga ahensya sama sa Department of Justice (DOJ), National Bureau of Investigation (NBI), ug Securities and Exchange Commission (SEC) gigamit usab aron i-pressure ang mga dili pabor sa impeachment.
Nahisgotan usab ni Marcos nga ang pipila ka pondo sa mga magbabalaod giingong nalangan human kini gimarkahan isip “for later release” o FLR, nga giingong nakaapekto sa mga proyekto para sa ilang mga distrito.
Bisan pa, wala nganli sa senador ang mga opisyal nga giingong nakasinati og pressure gikan sa administrasyon.
Ang Kamara gikatakdang mobotar sa mga artikulo sa impeachment batok kang Duterte, nga nagkinahanglan og labing menos 106 ka boto nga ipasa sa Senado alang sa husay.
