Gi-umol sa Department of Justice (DOJ) ang usa ka “special panel of prosecutors” aron maglunsad og komprehensibong imbestigasyon sa mga insidenteng nahitabo sulod ug palibot sa Senado niining semanaha.
Sa iyang unang pagpakita sa publiko human sa pipila ka adlaw nga pagpakahilom, gipahibalo ni Justice Secretary Fredderick Vida ang pagporma sa espesyal nga grupo nga motutok sa case buildup ug imbestigasyon sa mga nahitabong kaguliyang sa Senado.
Sumala sa kalihim, ang mga prosecutor nga gi-assign sa panel adunay awtoridad sa pag-isyu og subpoenas ug uban pang legal nga mando kon gikinahanglan aron mapadali ang imbestigasyon.
Gimandoan usab ni Vida ang mga law enforcement agencies nga isumite sa DOJ ang tanang ebidensyang ilang natigom may kalabotan sa mga panghitabo sa Senado gikan Mayo 11 hangtod 13.
Lakip sa gimandoan nga mokooperar mao ang Philippine National Police-Scene of Crime Operatives, National Capital Regional Police Office, Pasay City Police Station, ug National Bureau of Investigation.
Gihatagan sa DOJ ang mga ahensya og 48 oras aron mapreserbar ug ma-turn over ang tanang ebidensya nga ilang gihuptan.
Gimandoan usab sa departamento ang Office of the Senate Sergeant-at-Arms pinaagi sa opisina ni Alan Peter Cayetano nga isumite ang ilang report ug mga ebidensya, lakip ang CCTV footage, resulta sa ballistic ug paraffin examinations, deployment records, communication logs, incident reports, ug mga pahayag sa mga saksi.
Giawhag usab ni Vida ang publiko ug mga miyembro sa media nga motabang sa imbestigasyon pinaagi sa pagsumite og mga ebidensya nga mahimong makatabang sa komprehensibong case buildup investigation sa DOJ.
