Luwas nga nakabalik sa Pilipinas ang 34 ka mga overseas Filipino workers (OFWs) ug usa ka dependent gikan sa Qatar niadtong Sabado, isip kabahin sa mga paningkamot sa gobyerno sa pagpauli sa mga Pilipino nga naapektuhan sa nagkagrabe nga tensyon sa pipila ka bahin sa Middle East.
Ang grupo miabot sa Ninoy Aquino International Airport (NAIA) Terminal 3 sa Pasay City sakay sa Qatar Airways Flight QR934, sumala sa Department of Migrant Workers (DMW).
Diin giabi-abi ang mga repatriates sa mga representante gikan sa DMW, Overseas Workers Welfare Administration (OWWA), ug mga medical personnel gikan sa Manila International Airport Authority (MIAA), uban sa New NAIA Infrastructure Corporation.
Ingon man nga gihatagan dayon ang mga OFW og tabang ug gipailalom sa assessment aron masiguro ang ilang hapsay nga pagbalik sa nasud.
Sumala sa mga awtoridad, ang gobyerno padayon nga nagmonitor sa sitwasyon sa Middle East human sa nagkagrabe nga tensyon ug kagubot sa rehiyon nga nag-aghat sa pipila ka mga overseas Filipino workers sa pagpangayo og tabang aron makabalik sa Pilipinas.
Una nang gitaho sa DMW nga nakadawat sila og daghang hangyo alang sa pagpapauli gikan sa mga Pilipino sa mga apektadong lugar samtang nagkagrabe ang tensyon sa rehiyon.
Tungod niini, gipahibalo sa ahensya nga andam na ang mga lakang sa contingency kung kinahanglan ang mas lapad nga operasyon sa pagbakwit.
