Nakurat sa mga netizen ang kalit nga anunsyo sa usa ka photo and videography company nga gikasal na ang basketball star nga si Kai Sotto ug ang actress-model nga si Rere Madrid.
Sa ilang social media post niadtong Miyerkules, Mayo 27, gipahalipayan sa maong kompanya ang bag-ong kasal ug gikumpirma ang duha isip bana ug asawa pinaagi sa caption nga “No more ‘you’ and ‘me’—only us from here on out. Officially married.”
Sa bahin ni Rere Madrid, iyang gipaambit sa iyang Instagram post ang iyang emosyon ug ang dagan sa ilang panag-uyab hangtod sa ilang kasal diin iyang gipahayag nga morag dili pa katuohan nga matawag na nila ang maong adlaw nga ilaha isip Mr. & Mrs. Sotto. Nagpasalamat usab siya sa Ginoo, sa ilang pamilya, ug sa mga tawo nga nisurender ug nipaluyo sa ilang relasyon.
Iyang gisaysay nga bisan pa man sa mga hagit ug dili pagsinabtanay nga ilang giagihan, gipili gihapon nila ang mosalig sa usa’g usa, butang nga mas nagpalig-on sa ilang panag-uban.
Nagpadayag usab siya og pasalamat sa ilang mga ginikanan ug mga igsoon nga nahimong kabahin sa ilang relasyon, ug iyang gilitok nga usa sa pinakanindot nga pagbati alang kanila mao ang panag-uban sa duha ka pamilya.
