Kusganong gikuwestiyon ni Senador Imee R. Marcos ang Executive Order No. 116 nga nagpalapad sa importasyon sa baboy sa nasud pinaagi sa pagpataas sa Minimum Access Volume (MAV) gikan sa 54,210 metriko tonelada ngadto sa 204,210 metriko tonelada, o halos upat ka pilo nga mas taas.
Sumala sa gobyerno, ang lakang gituyo aron mapuno ang suplay sa baboy ug ipaubos ang presyo niini sa merkado taliwala sa inflation.
Apan giinsistir sa senador nga ang basehanan sa maong palisiya dili igo.
Gipunting usab niya nga ang problema sa lokal nga industriya sa baboy dili ang kakulang sa suplay, apan ang epekto sa kaylap nga importasyon.
Sumala ni Marcos, niabot og 891 milyon ka kilo nga imported nga baboy ang nisulod sa nasud niadtong 2025, samtang halos 300 milyon ka kilo ang gi-import sa unang upat ka bulan sa 2026.
Dugang niya nga ang presyo sa lokal nga baboy sa umahan miubos usab gikan sa ₱170 kada kilo sa miaging tuig ngadto sa ₱165 kada kilo karong tuiga, nga iyang giingon nga epekto sa pagdagsa sa mga imported nga produkto sa merkado.
Gikutlo usab ni Marcos ang datos gikan sa Samahang Industriya ng Agrikultura (SINAG) nga nagpakita nga ang lokal nga produksiyon gamay ra nga mikunhod gikan sa 1.411 milyon metriko tonelada sa 2024 ngadto sa 1.377 milyon metriko tonelada sa 2025, o katumbas sa pagkunhod sa gibana-bana nga 34,000 metriko tonelada.
Sa katapusan, nanawagan si Marcos sa gobyerno nga wagtangon ang EO 116 ug mag-focus sa pagpalig-on sa lokal nga industriya sa baboy pinaagi sa programa sa repopulation, biosecurity batok sa ASF, ug mas lapad nga suporta sama sa mga pautang, insurance, ug direktang tabang sa mga nagbuhi og baboy.
