Opisyal nga gipahibalo sa Miss Grand International (MGI) Organization ang pagbukas sa mga aplikasyon niini alang sa ikaduhang season sa MGI All Stars, ang global pageant nga nagpakita sa mga kanhing partisipante sa nagkalain-laing international beauty competitions.
Sumala sa MGI, ang mga aplikasyon magsugod sa Sabado, Hunyo 6, 2026 ug ang kompetisyon nagtumong sa paghatag sa mga beterano sa pageant gikan sa lain-laing mga nasud og ikaduhang higayon.
Ang MGI All Stars abli sa mga babaye nga nag-edad og 20 hangtod 40, minyo man o adunay mga anak, lakip ang mga transgender nga babaye, basta sila miapil sa mga international pageant.
Sa unang edisyon sa kompetisyon, si Vanessa Pulgarin sa Colombia, usa ka kanhing Miss Universe semifinalist, gikoronahan nga grand winner sa finals nga gipahigayon sa MGI Hall sa Bangkok niadtong Mayo 30.
1st runner-up si Faith Maria Porter sa Ghana, samtang ang 2nd runner-up si Nguyen Huong Giang sa Vietnam, usa ka kanhing mananaog sa Miss International Queen ug partisipante sa Miss Universe.
Moabot sa 56 ka mga kandidato gikan sa 38 ka mga nasud ang miapil sa unang season, lakip na ang mga gikan sa Miss Universe, Miss World, Miss International, Miss Earth, Miss Supranational, ug Miss Grand International.
Lima gikan sa Pilipinas ang miapil, lakip na si Gazini Ganados, usa ka kanhi Miss Universe Top 20 semifinalist, kinsa nakaabot sa Top 5.
Sumala sa MGI, ang entablado ablihan pag-usab alang sa mga “bituon” nga andam na nga mobalik sa kompetisyon. “Usa ka bag-ong kapitulo ang magsugod na… andam na ba kamo nga mosidlak pag-usab taliwala sa mga bituon?” matod sa organisasyon.
Ang mananaog, si Pulgarin, nakadawat og $100,000 ug adunay higayon nga depensahan ang iyang korona sa sunod nga season, nga mahimong magdala og kinatibuk-ang premyo nga hangtod sa $1 milyon kung modaog siya sa tulo ka sunod-sunod nga edisyon.
Samtang, ang Presidente sa Miss Grand International nga si Nawat Itsaragrisil miingon nga target niya nga ipahigayon ang sunod nga edisyon sa Disyembre, bisan kung wala pa’y pinal nga mga detalye nga gipagawas.
