Gipaniguro sa Cebu City Police Office ang kaluwasan sa mga estudyante, atol sa pag-abli sa klase gahapong adlawa, Hunyo 8, pinaagi sa paghatag og police visibility ngadto sa nagkalain laing tunghaan.
Kini ang gikabutyag ni PLTCOL Miguel Andeza, ang Deputy City Director for Operations (DCDO) sa CCPO, diin iyang gikabutyag nga subay sa ilang partisipasyon sa Oplan Balik Eskwela 2026, mideploy og mga police assistance desk ang tanang mga police stations sakop sa CCPO ngadto sa mga tunghaan sulod sa ilang mga hurisdiksyon aron sa pagsiguro nga adunay kadangpan ang mga ginikanan ug mga bata nga makasugat og suliran atol sa pag-abli sa klase.
Mideploy usab sila og dugang mga police personnel aron sa pagpasiguro sa police visibility sa school zones, lakip na ang mga mobile traffic police force nga andam momando sa trapiko sa mga kadalanan nga maapektohan sa pagsulod ug paggawas sa mga estudyante sa mga pampublikong tunghaan sa dakbayan.
Gitino sab ni Andeza nga nahimong priority sa deployment sa mga kapulisan ang mga nag-unang pampublikong tunghaan sa Dakbayan nga daghan ang populasyon sa magtutungha ug nahimutang sa daplin sa mga national highways sama sa City Central School, Zapatera Elementary ug High school, Pardo, Labangon ug Basak Elementary ug High School.
