Nisaka na ngadto sa 65 ang ihap sa mga namatay sa magnitude 7.8 nga linog nga miigo sa Mindanao niadtong Hunyo 8, usa ka semana ang milabay.
Sa pinakabag-o nga report sa National Disaster Risk Reduction and Management Council (NDRRMC) karong Lunes, Hunyo 9, ang gidaghanon sa mga apektadong pamilya misaka ngadto sa 176,186 o anaa sa 736,386 ka mga indibidwal, gikan sa inisyal nga report nga kapin sa 173,000 ka mga pamilya.
Sa maong gidaghanon, kapin sa 3,000 ka mga pamilya ang nagpabilin pa sa mga evacuation center samtang kapin sa 59,000 ka mga indibidwal ang temporaryong nagpabilin sa gawas sa mga evacuation site.
Gi-report usab sa ahensya nga moabot sa 1,447 ka mga indibidwal ang nasamdan sa kalamidad ug 36 ka mga indibidwal ang gitaho nga nawala, bisan pa ang maong gidaghanon gipailalom pa sa pag-validate.
Samtang, 39 ka mga siyudad ug lungsod ang padayon nga nakasinati og mga pagkawala sa kuryente samtang 16 ka mga lokalidad ang wala pa gihapon suplay sa tubig.
Tungod sa makadaot nga epekto sa linog, 14 ka mga siyudad ug munisipyo sa nasud ang gibutang ubos sa state of calamity.
Nagpadayon ang mga operasyon sa gobyerno sa pagtabang ug pagtubag ug nakahatag na og P137 milyon nga kantidad sa tabang ngadto sa mga apektadong pamilya.
