Nisaka na ngadto sa 35 ang ihap sa mga namatay sa magnitude 7.8 nga linog nga miigo sa probinsya sa Sarangani niadtong Lunes sa buntag, sumala sa pinakabag-o nga report gikan sa National Disaster Risk Reduction and Management Council (NDRRMC).
Sa report niini nga gipagawas, ang NDRRMC miingon nga sa 31 ka namatay, 16 ang gikan sa SOCCSKSARGEN o Region XII samtang tulo ang gikan sa Davao Region o Region XI.
Sa 16 ka namatay sa SOCCSKSARGEN, napulo ang gikan sa General Santos City, tulo gikan sa Glan, duha gikan sa Tupi, ug usa gikan sa Malapatan.
Samtang, ang ahensya nakatala usab og kapin 130 ka nasamdan, 142 gikan sa SOCCSKSARGEN ug lima gikan sa Davao Region.
Gikataho sa NDRRMC nga 12 ka tawo ang nawala human sa kusog nga linog.
Laing linog usab ang natala sa pipila ka bahin sa Sarangani human sa magnitude 5.7 nga linog nga mitay-og sa kadagatan duol sa Balut Island, Sarangani gabii ug nasundan pa kini og 5.3 magnitude.
Subay niini, gipasalig sa Malacañang nga ang gobyerno aduna pa’y igong pundo, ilabina ang Quick Response Fund, aron ipadayon ang mga rescue operation ug pagtubag sa mga epekto sa 7.8 magnitude nga linog sa Sarangani.
