Gibanabanang nagkantidad og $300 bilyon nga private investment fund ang gikataho nga lakip sa usa ka framework agreement tali sa Estados Unidos ug Iran nga nagtumong sa pagtapos sa gubat sa Middle East.
Sumala sa usa ka tinubdan nga adunay direktang kahibalo sa maong kasabutan, ang maong pondo gidesinyo aron dasigon ang Iran sa pagkompleto sa usa ka hingpit nga kalinaw uban sa Estados Unidos.
Kapin sa katunga sa maong kantidad ang gikataho nga gipasalig na sa nagkadaiyang mga kompanya gikan sa Estados Unidos, Gulf states, Asya, South America, ug Africa.
Ang pondo nakatutok sa pagpamuhunan sa mga importanteng sektor sama sa enerhiya, transportasyon, manufacturing, ug logistik.
Giklaro sa maong taho nga kini nga “Reconstruction and Development Fund” dili mogamit sa kwarta sa gobyerno, kondili usa kini ka pribadong pondo sa pamuhunan.
Apil sa maong plano ang posibilidad sa pagpahulam ug pagpondo alang sa pagtukod pag-usab sa mga imprastraktura sa Iran nga nadaot sa gubat, lakip na ang mga pasilidad sa industriya ug transportasyon.
Gidugang pa sa tinubdan nga kini nga pondo lahi ug walay kalambigitan sa bulag nga mga hisgutanan bahin sa pagtangtang sa mga silot ug sa pagbawi sa mga na-freeze nga kabtangan o asset sa Iran.
Sa pagkakaron, wala pa’y opisyal nga kumpirmasyon ang kagamhanan sa Estados Unidos kalabot sa maong pondo sa pamuhunan.
