Moabot sa 13 ka mga senador ang mitambong sa roll call sa pag-abli sa special session sa Senado karong adlawa, Miyerkules, Hunyo 17, 2026, hinungdan nga pormal nang nadeklara ang usa ka quorum sa taas nga kapulungan sa Kongreso.
Ang maong gidaghanon sa mga magbabalaod igo na kaayo aron masugdan ang sesyon ug pormal nga mapili ang bag-ong liderato sa Senado.
Lakip sa mga sayong mitambong nga giingong kaalyado ni Senador Sherwin Gatchalian mao sila si Senador Juan Miguel Zubiri, Bam Aquino, Vicente Sotto III, Panfilo Lacson, JV Ejercito, Risa Hontiveros, Kiko Pangilinan, Lito Lapid, Erwin Tulfo, ug Raffy Tulfo.
Apil usab sa mitambong si Senador Francis “Chiz” Escudero, kinsa bag-o lang mibulag gikan sa block ni Senador Alan Peter Cayetano.
Samtang, si Senador Joel Villanueva mao ang nagsilbing ika-13 nga senador nga misulod sa hawanan, diin iyang gikompleto ang gikinahanglang numero aron maduso ang pagpapili sa bag-ong Senate President.
Sa pikas bahin, nagpabilin nga absent ug wala gihapon mitambong sa maong espesyal nga sesyon ang mga senador nga nailang kaalyado sa grupo ni Cayetano.
