Gisaway ni UN aid chief Tom Fletcher ang mga babag nga gihimo sa Israel sa pag-apod-apod sa humanitarian assistance dungan sa pag-ingon nga angayan nga mabalik ang “dignidad” sa mga tawo sa Gaza ug dili lang basta mabuhi sa kalisod.
Atubangan sa United Nations Security Council, giila ni Fletcher nga miuswag ang dagan sa tabang sukad niadtong Oktubre 10 sa dihang nag-epekto ang ceasefire tali sa Israel ug Hamas, diin moabot sa average nga 100 ka mga deliveries ang nakasulod sa teritoryo sa Palestine kada adlaw.
Apan, matud niya, kining mga ginagmay nga kaayohan mao lamang ang pinakagamay nga gikinahanglan sa mga Palestinian, kung unsa ang mahatag sa UN, ug kung unsa ang gidemanda sa international law.
Matud pa ni Fletcher, dili mahimong tugotan nga ang tumong ra mao ang kalibutan diin ang mga bata adunay igong calories aron mabuhi ug maluwas sa sige nga pagpamomba, apan nagpabilin gihapon silang gutom, walay puy-anan, ug wala makatungha sa eskwelahan.
Tungod niini, nanawagan si Fletcher nga ablihan ang tanang crossing points padulong sa Gaza ug wagtangon dayon ang mga pagdili sa Israel sa pagsulod sa mga butang sama sa medical equipment ug krudo.
