Nagkagubot ang mga magtutudlo ug estudyante sulod sa San Jose National High School sa Tacloban City, Leyte human sa pagpamusil nga nahitabo sulod sa eskwelahan pasado alas-9:00 sa buntag karong Lunes, Hunyo 22.
Sumala sa impormasyon gikan sa Police Station 1 sa Tacloban City Police Office (TCPO), tulo na ang kumpirmadong namatay samtang pito na ang nasamdan sa maong insidente.
Pipila ka gutlo human sa insidente, nadakpan sa kapulisan ang duha ka suspek sa pagpamusil.
Kung diin, ang usa sa mga suspek ang nasikop sulod sa eskwelahan, samtang ang usa pa nadakpan atol sa hot pursuit operation sa mga otoridad.
Ang duha ka suspek giingong mga estudyante sa maong eskwelahan.
Subay niini, nagpagawas ang Department of Education Regional Office VIII og opisyal nga pahayag ug nagpahayag og dakong kabalaka sa nahitabong pagpamusil.
Matud pa sa DepEd, dihang nahibal-an nila ang insidente, nakigkoordinar dayon sila sa Philippine National Police (PNP), Schools Division Office, ug sa mga opisyal sa eskwelahan aron masiguro ang kaluwasan ug seguridad sa mga estudyante, magtutudlo, non-teaching personnel, ug uban pang mga indibidwal sulod sa kampus.
Gisuspenso usab ang mga klase sa maong eskwelahan samtang padayon ang imbestigasyon sa insidente nga karon gitutokan sa mga awtoridad, ilabina sa PNP.
Samtang, nangayo ang DepEd og mga pag-ampo alang sa kaluwasan ug dali nga pagkaayo sa mga naapektuhan sa maong trahedya.
