Gidunggab-patay ang usa ka 33-anyos nga babaye sa iyang kapuyo sa makadaghang higayon tungod sa selos sa Sitio Dap-Dap, Barangay Dumlog, Toledo City, Cebu niadtong Sabado, Hulyo 4.
Giila ang biktima si alyas An-an, residente sa naasoy nga lugar, samtang ang suspek mao ang iyang kapuyo nga si alyas Cyril, 40-anyos.
Nasamdan usab ang ama-ama sa biktima nga si alyas Pedro, 63-anyos, sa dihang gikulata siya sa suspek tungod sa pagsulay sa pagpugong sa kagubot.
Basi sa imbestigasyon sa Toledo City Police Station, gawas nga naka-inom og ilimnong makahubog ang suspek, giingong nagselos usab kini nga nagtukmod kaniya sa pagbuhat sa maong krimen.
Sa wala pa ang insidente, nibalik si alyas An-an sa balay sa iyang stepfather human siya nakiglalis sa suspek. Apan, gikatahong misulod ang suspek sa balay sa mga biktima pinaagi sa pagguba sa steel grating sa kusina.
Diin nag-andam ang biktima og panihapon sa dihang gidunggab siya sa suspek, gamit ang gunting sa iyang agtang, nawong, ug liog.
Gidepensahan sa stepfather ang biktima pinaagi sa pagbunal sa suspek gamit ang steel bar. Apan, nababagan sa suspek ang stepfather, ug ang steel bar nalabay ug didto na nakahigayon ang suspek sa pag-kulata sa stepfather.
Gidala ang mga biktima sa Toledo City Hospital apan, gideklarar nga patay na pag-abot ang biktima. Samtang, atol sa hot-pursuit operation niadtong Domingo sa buntag, nadakpan sa mga awtoridad ang suspek sa Barangay Cambang-ug, Toledo City.
